GURIT SAPUNGKURE CAHYA
: Pak Dharmadi
Iki dudu babagan langit sap pira
kang tinembus lungiting tembung lan pada,
nanging bab sepira tataging sunaring surup
kang kemlawe pindha slendhang sandhekala
tanpa kendhat ngreranggeh pucuk-pucuk jati aking,
sanajan padhang kang kasisa mung bisa ninggal japa
lan nguntabake dina marang jaman tan kinawruhan
(Oh Bapa, mesthi panjenengan kelingan
lakon Bhisma
kang ora tumekeng
ati jebol Jonggring Salaka
kanti jemparing kang
bisa memba kridhaning naga)
Saengga angin kang kelangan daya, lan jumangkah
kanti was sumelang sajembaring ara-ara bera
isih saguh ngugemi prasetyaning gerimis
kang bakal neba salumahing suket garing,
supaya geguritanmu kang nglangut pindha donga
isih bisa tak deder sauruting tritis raina
mrajak semi, ngrembaka sadawaning mangsa.
(Oh Bapa, saumpama panjenengan
mangarteni,
jangkah panjenengan kang
tanggon sapungkure cahya
luwih kuwawa
nuwuhake sasmita lan pengarep-arep
tinimbang sakehing
tembang lan ukara)
Purbalingga, September 2020
SEWU TAUN DAK LIWATI
Sewu taun, aku panggah jejeg ing kene,
kanti sewu jemparing kang isih tumancep ing raga
tumapak sandhuwuring jaman-jaman kang rengkah
tanpa kendhat nempuh kukusing pasulayan:
Geni kang ora tau sirep sajroning netramu
sanajan gendhing lan kidung wus gilir gumanti
miyak abad baka abad kang tansah kebak sungkawa.
Oh Srikandi, sawangen kang permati, Wong Ayu
Sewu taun aku isih jejeg satengahing palagan
Ngregem watang tombak pindha gujengi lungiting panandang
tugur kanti dedeg kang tatag, mapak tebaning pepesthen
ngrantu lumepasing pusakamu kang pungkasan:
Jemparing turidhasmara kang bakal natas panelangsa
kang wus sewu taun dak gurit nganggo tetesing getihku.
Sriwedari-Solo, pungkasaning Januari 2007
SENDHON ING DINA NATAL
Isih dak simpen ceritamu iki: Luh kang tumetes
kaya dene gerimis kang mecaki dalan cengkar
antaraning Getsmani lan Golgota. Banjur gurit surup
kang pindha khutbah ngumandang saka gisiking akasa,
“Katresnan mono Wong Ayu, mesthine tan beda
kalawan iman, luwih teguh tinimbang pepati lan kasangsaran.
Solo,
Desember dina pungkasan, 2005
Anggitane:
