Geguritan puniko diwaos kalian Poro Winasis wonten acara Dialog Seni dan Budaya Yogya Semesta ke-140 kanthi judul "Perang Lawan Covid" ing Pendopo Wiyotoprojo, Kepatihan, Yogyakarta, Selasa, 31 Agustus 2021, wekdal 15.00-17.00 WIB.
SUWUK CORONA
Kanti nyebut Asmo Kang Akaryo Jagat
Kanti madep manteb nyuwun tulung dumateng Gusti Pangeran Kang Murbeng Dumadi
Kanti niat reresik kabeh rereget ing segoro ati lan ing langit bumi
Suwuk Corona iki tak kumbah nganggo dongane poro Nabi
Tak kelekke kali nganti ora iso bali
Suworo Adzan Pitu njedul soko langit dan soko bumi
Gumregah dadi suworo bledheg yang kang nyamber-nyamber
Banaspati kabeh mati
Gendruwo kabeh mati
Virus Corona kabeh mati
Wis tinulis ono ing buku pinter lan kitab suci
Rusake ndunyo iki jalaran soko polah tingkah manungso
Kebak dosa lan lali kabeh marang Gustine
Mringis naliko kebukak wadi
Mrongos naliko pinesti dadi tumbale bumi
Kabeh kudu percoyo menowo virus corona iki asale seko kelakuane manungso
Ngakune manungso nanging tumindake lakune kewan kabeh
Prasasat luwih olo ketimbang babi lan asu
Mugo-mugo kabeh mou ndang tobat supoyo uwal soko bebendu
Suwuk iki ngruwat jagat
Reresik segoro lan gunung
Niti laku amrih urip luwih becik lan ninggalke nefsu lan nesu
Suwuk iki ngrawat sawiji greget sengguh ora mingkuh
Suwuk iki nggedruk bumi supoyo minggat kabeh memolo lan balak bilahi sing gawe leloro lan gawe pati
Gedebuh krincing gobras-gabrus bablas coronane
Minggat kabeh sekabehane leloro kang marahi peteng ndedet kahanan ndunyo
Minggat kabeh kelakuan elek koyo telek poro manungso
Ajur mumur ati olo kebak dosa sing gaweane dadi tukang fitnah lan tego nglarani sepodo-podo
Suwuk iki nyuwil ngendikane Gusti Pangeran Sing Nyekel Nafase Langit lan Bumi
Kanti pangucap Ora Ono Kang Wajib Disembah Kejobo Gusti Kang Murbeng Dumadi
Suwuk iki nyuwil ngendikane Kanjeng Nabi
Supoyo slamet soko kabeh beboyo moko kowe kabeh kudu gegandulan marang Qur'an lan Sunnahe Nabi
Ojo pisan-pisan tumindak olo karo wong mlarat lan ojo nggetak bocah yatim
Suwuk iki ugo nyuwil pangandikane poro wali kang wus nulis kidung rumekso ing wengi
Kanti nyekel iman sing tan keno wola-wali
Kudu andap asor kudu lembah manah lan kudu wani ngunduh wohing pakerti
Suwuk iki dirapal nganggo ati kang wening
Diseblakke ono tawang sing kebak lintang nganggo ngucap syahadat kanggo pepeling
Kabeh gendruwo kabeh bebendu kabeh memolo minggat seko ndunyo
Suwuk iki disebulno marang ubun-ubun kabeh bayi lan kabeh rondo
Dadi pepadang dadi obat lan dadi kolosubho kabeh menungso
Kanti pangucap wolo-wolo quwwato
Kanti pangucap yo kayuku yo kayumu
Kanti pangucap semeleh ben ora seleh
Kulo nyuwun tombo teko loro lungo marang Gusti Allah Kang Mangerani Sedoyo Titah
Suwuk iki tinemu soko laku prihatin lan nglakoni topo broto
Kakang kawah lan adi ari-ari podo kumpul melu ngamini
Kiblat Papat Limo Pancer soko ati kang wening bening lan nyawiji
Nggolek pepadang nganggo wirid lan nyinau langit bumi
Kabeh Gong wus tinabuh kanggo ngresiki kabeh residu ing jero ati
Nang Ning Nong Gung
Nang Ning Nong Gung
Nang Ning Nong Gung
Kang Moho Wenang bakal paring Ati Wening
Semar Gareng Petruk Bagong kabeh podo ngajak tumindak becik lan tansah nyembah Kang Moho Agung
Jogja, 10 Muharram 1443 Hijriyah
Panggurit
H.M. Nasruddin Anshoriy Ch. inggih meniko Budayawan lan Kiai ing Pesan Trend Budaya Ilmu Giri, Yogyakarta.
