JADWAL WAYAH ESUK
Tabuh telu iki kudu cethik geni
Mawa areng balapan pating grengseng
Mlethek plethok-plethok saka pawon
Mrambat ruwang tamu
Mlipir kamar turonmu
Geneya kebribenan tangi?!
Gumbregaha, wudlu, tumuju subuh
Balikmu wis cemepak sak kabehe lawuh
Sak iki banjur giliranmu
Nyebarake saketheng gorengan gaweyane simbok
Menyang bakul-bakul njero pasar
Sak durunge sing kulakan padha bubar.
Gemblegan, Solo, 2021
JADWAL WAYAH
AWAN
Bubar tlusupan keceh mburu butuh
Pikiran leren njajal nglabuh
Kaya gemetere lakune kapal kae
komplit santer keluke
Yen kepengin gemlethak
sak petungan ana lincak
pegel githok, manjer geger lan
mubeng sirah
nyawiji pasrah
Ora ketang sak jam; bubar kuwi
bali balapan.
Semarang, 2021
JADWAL WAYAH
SORE
Jogan kebak racikan; irisan tempe
irisan lombok, adonan glepung
rajangan werna-werna klebu
parutan klapa
nyokong urip dedeg prasaja
Yen kabeh gaweyan wis rampung cemepak
Ndhekep dhipan kesurung kepenak
Aku ora kepengin mabur dadi tukang nyanyi
bintang film tekan sinetron
Cukup nonton karo nguntuti beton
nyamleng – ora perlu nggayuh sing methentheng.
Tlogomulyo, 2021
JADWAL WAYAH
WENGI
Nibakke awak ana dhipan cekak
Kasur gripis tipis dudu weton iklan
Nanging kasur sing tansah ngabekti karo janji
puluhan taun ora nate gawe getun
Nyurung lintingan awak tumuju gapuk
kapuk-kapuk njimpes ora netes
Sedaya kula lila Gusti
Mlajenge gesang namung pasrah mili.
Semarang, 2021
WARUNG TENGAH
KAMPUNG
Isih kewaca, cagak pring cilik sing ndhelik
ana warunge Cik Wa tengah kampung sing
ora nate kelangan rubung
Saka sak wernane premen, dolanan plastikan
tekan gula pasir buntelan seprapatan
“Sekilo wae Cik,” pesenku. Cik Wa kaget nyawang aku
“Prapatan gunggung papat gelem?”
Guluku gemeter santer
Awak kedher
Apa maneh bareng ana mbok tuwa nyusul nempil gula
seprapat
kabeh entek, gawe mlongo
Tak walik kaca-kaca buku sing temangsang sirahku
Gula sepratan loro tak caoske
Ndlongop gumunne, mbuh kapan rampunge.
Semarang, 2021
SETENGAH UNTING
BAYEM
Bayem setengah unting, kanggomu kakehan
mung karo bojo; wong loro
Ana ngarep warung cagak pring petung
nekad nunggoni wong tuku karo milang-miling
Sapa ngerti bisa diajak blandhronan
nempil bayem untingan?!
“Ora sah nungu, cupet wektumu
Iki tak caosi separo,” tembunge grapyak
Sisa dhuwit dijereng-jereng
Teri sak buntel gage digoreng
Sanadyan lali mikir, dhedhepan tensi terus ndhukir.
Wonogiri, 2021
PITIK
PANGGANG
Pitik panggang
kebak bumbu sing
mbiyen nate
mbok grujugi bumbu
mung krasa tak
ambu wangi lan gurihe
njaga wibawa
dipupurke pitik mau
saka dhadha
tekan mekangkange pupu
gawe mesem
nalika banjur kelingan sliramu
Pitik panggang
sing digandrungi penggedhe iki
Nyeret banter
pikiranku dadi lega
Sega anyar
pulen kemebul lan sambel ulegan ana lemper
sing pedhese
molat-molat
nyurung awak
dadi giras; nekat nemoni awak wewegmu
Adhuh! Pikiran
alaku dadi kemlebat
Nyawang pupu
suburmu sing ora mekakat.
Slogoimo, 2021
TUWA
BARENG
Aku mesem sujana
nyawang awakmu
sing bebarengan mabur angkasa
Menep. Temangsang
nginep endha saka rusuh dhedhep
Nanging,
awakmu ora ana kene
Ana prapatan
dalan sing kebak pit montor penthalitan
Aku tambah
gregetan nalika
tangan alusmu
nyikep bangkekan
blas ora mikir
kapangku sing keplantrang
Jogjakarta, 2021
REREGET
Rereget sing
diseret ana grobag
Ora mung
ngusung turahan saka kiwa tengene pawon
Nanging uga
bathang tikus sing kalah playon
Gandane
nyubles irung nganti bolong
saengga lara
pilek dadi mak plong
Ganda puleg
mau mrambat ana pikiranmu
Kegawa menyang
warung lan andrawina prasaja
Mencok kenceng
nalika anakmu sing mbok dulang meneng
Kebangeten!
Bathang kok tegel ora diplastiki
Apa maneh
dirangkepi
Gandane nlusup
menyang kupinge sisihanmu
Nganti nesune
sumup ana kupingmu:
“Pak, sesuk
prei. Njaga wibawa ben aji!”
Awakmu
domblong, nyawang bolong dhastere sisihan
“Aku mandeg
sasi ngarep Bu, kareben dhaster
rega telung
puluh lima ketuku,” semaurmu.
Semarang, 2021
SEDULUR
BANJARNEGARA
Udan-udan ndhekep
hawa adhem
Ora kinira
pancen; nalika esuk mau
srengenge sumunar
babar
Nyeret awan
bruwet gawe byayakan
memehan
kelangan papan
Klebu awakmu
sing tangi
esuk mau, sak genthong dhawet
komplit santen
lan juruh
ngremet abuh
bathuk
mengkeret gemontang tabuh
arep bali
ndesa sing isih nelangsa
apa mbacutake
kontrakan sing sasi ngarep
Budi Wahyono, penggurit kelairan Wonogiri. Guritanne kapacak ana ariwarti Parikesit, Panjebar Semangat, Jaya Baya, Kartika, Mekar Sari, Derap Guru, Suara Merdeka, Solopos, Chandra Pustaka, Swaratama. Bola-bali entuk penghargaan ing babagan geguritan, minangka pemenang lomba. Sakliyane geguritan uga nulis cerkak. Kumpulan Geguritane sing wis nate terbit: “Mung Remukan Gorengan” (2020), “Kelingan Gaplek” (2021), uga semebar ana pirang-pirang antologi. Sejene nganggo medium basa Jawa uga nulis kanthi basa Indonesia wujud; esai, kolom, puisi, cerpen, laporan, resensi, lsp. Magister lulusan Fisip UNDIP iki manggon ana pinggiran kutha Semarang.
___________
